-->

روايه صفقه على مطلقه الجزء السابع والثامن








روايه صفقه على مطلقه 7


الجزء السابع


الكاتبه // كوكى سامح

الست قالت انتى لازم تتجوزيه يا زهره

زهره بتحاول تفك نفسها منها وبتقول 

انتى بتقول ايه يا مجنونه انتى 

وحاولت تلمسها ولقيتها خيال... 

وفجأه الست بتختفى وصوتها مسمع وبتقول 

اتجوزى منسى يا زهره انتى اللى هتاخدى حقى 

يا بنتى 

زهره قعدت مكانها وجسمها ابتدى يرتعش 

وتلج من الخوف وقالت : انت فين يا زاهر

انا بجد خايفه وقامت من على السرير

وعينها بتبص شمال ويمين وشكلها مش طبيعى

فون زهره رن وكان عادل

شافت رقمه ومتنحه ورددت عليه وهى بتبكى

وقالت إن أهلها ماتوا اثر اختناق الغاز

وكان رده عليها انها لازم تشوف شغلها

لانه محتاج ورق الصفقه الجديده فى شغل منسى

والوقت مناسب لأنه مشغول فى موت مراته

وقفلت معاه ورمت الفون وقالت

محدش بيحس بحد انا أهلى راحوا كلهم وهو

بيقولى شغل وبقت تكلم نفسها

انا بجد تعبانه ونفسى اموووت انا خلاص مش

عاوزه حاجه بعد فراق ماما 😭 وبابا 😭 واخواتى 😭

وسكتت شويه وقامت بصت فى المرايا

وقالت : اللى انا شوفته ده خيال ولا حقيقه

يا ترى مين الست دى وعاوزه منى ايه؟ 

وبعدين عاوزانى اتجوز منسى ليه! 

وكمان حق ايه اللى بدور عليه 

انا مش فاهمه حاجه حاسه ان تفكيرى اتشل

ودلوقتى انا لوحدى مش عارفه اعمل ايه

ومسكت الفون واتصلت ب زاهر

وكان جرس ولا توجد استجابه

ورمت الفون على التسريحه وفضلت واقفه

قصاد المرايا وكأنها متسمره مكانها

وكل تفكيرها فى الست دى مين ويا ترى حقيقه

ولا وهم وفجأه الفون رن واتفزعت وكان زاهر

ولما رد عليها قالها انه رايح على ڤيلا عمه

ومش هيقدر يسيبه حالياً

رددت وقالت : وهتسبنى انا لوحدى يا زاهر

.. لا طبعا مقدرش يا حبيبتى بس هخلص

شويه حاجات واطمن عليه وهكون عندك

رددت وقالت : انا قاعده لوحدى وخايفه وفى

حاجه عاوزه اقولك عليها! 

رد وقال : فى حاجه حصلت يا زهره؟ 

رددت وقالت: خلاص خلاص

.. كلها ساعتين يا حبيبتى واكون عندك

وقفلت معاه وهى مضايقه وكان نفسها

يكون جمبها

فى ڤيلا رجاء..

احمد.. ماما شوفتى المصيبه مرات منسى ماتت

وكمان مقتوله

رجاء.. منسى مين ؟

احمد.. منسى يا ماما المنافس بتاعنا فى السوق

رجاء اتخضت وقالت أمل اتقتلت معقول

.. امل مين يا ماما

.. مرات منسى يا احمد لا حول ولا قوة الا بالله

ياااه امل تتقتل بجد متستهلش كده والدموع 

نزلت من عينها 

احمد قرب منها وقال 

.. مالك يا ماما انتى بتعيطى؟! 

.. لأ يا حبيبى مفيش حاجه 

.. ماما انتى تعرفى مرات منسى لأن شكلك 

اتغير لما عرفتى خبر موتها

.. اه اعرفها امل دى كانت انسانه بسيطه 

وكانت بنت ناس ومحترمه وفعلا على خلق 

وأحيانا كنت بستغرب هى ازاى اتجوزت منسى 

ده لانه انسان حقير بجد 

.. ماما شكلك كده تعرفيهم كويس 

.. قبل ما باباك يموت تعب شويه فى الاول 

وكان السبب شغله فى السوق 

ولما تعب ودخل المستشفى كان أول الزائرين 

امل وبصراحه عملت الواجب وزياده 

فى الاول استغربت لأن منسى مكانش بيطيق 

خالك وباباك وده كان سببه النفسنه فى الشغل

والغل والحقد لأن باباك كان شاطر عنه وسابقه 

بكتير

بس شركه باباك  وقعت من لعبه من منسى 

وده اللى عرفناه بعد ما باباك مات وسابنا 

وقعدت فتره بعدها أشك فى تصرفات أمل 

لأنها كانت بتتصل بيا كتير وتطمن علينا

انا وانت وكمان كانت بتحاول تساعدنا 

لأن باباك مات بعد كله ما راح بس 

مكانش فاضل غير الشركه 

وانا كنت منهاره تماما ومش عارفه اعمل اى حاجه 

ولا فاهمه الشغل نظامه ايه 

وخالك عادل كان لسه صغير فى الشغل 

وبردوا مكانش فى فلوس علشان الشغل فى 

الشركه يمشى لان لعبة منسى وقعت باباك 

وبقى فعلا مفلس ومكانش حيلتنا غير الشركه 

.. يعنى بابا مات بسبب منسى 

.. ايوه يا حبيبى بسببه لما بابا خسر كل

فلوسه مستحملش ومات 

انت متعرفش يعنى ايه ابن العز لما يقع

.. علشان كده خالى عادل مش بيحبه يا ماما

.. خالك عادل ده بقى هو السبب فى بعد امل عننا

.. ليه يا ماما عمل ايه؟ 

.. بعد ما باباك مات كنا مفلسين ومفيش غير الشركه

وبس وطبعا مفيش فلوس

وخالك عادل فى وقتها استقر وقعد معانا هنا

فى الڤيلا وطبعا احنا كنا لوحدنا وملناش حد

غير عمتك تحيه وطبعا هى عايشه برة مصر

ومكنتش اقدر اطلب منها اى فلوس

لتمويل الشركه علشان نشغلها من جديد 

لأنها كانت رافضه جوازى من اخوها 

لانه كان غنى وانا كنت بنت فقيره بس جميله

وطبعا تحية وغيرها من الناس الاغنيه 

الجمال عندهم مش مقياس 

المهم الفلوس والأصل وبس 

.. وحصل ايه يا ماما خلى الشركه واقفت 

على رجليها ووضعنا فى السوق رجع زى الاول

.. الصبر يا احمد ما انا بحكيلك اهو 

فى يوم بقى كنت قاعده فى نفس مكانى 

ده وكان قاعد مكانك خالك عادل 

بس كنا خلاص دليلنا احتار وقررنا نبيع الڤيلا 

بس ربنا كان لى تدبير تانى خالص

لقيت البواب بيقول فى واحده عاوزه تشوفك 

قولتلوا خليها تتدخل 

ولما دخلت كانت المفاجأه امل مرات منسى 

كانت ست جميله اوى ومحترمه 

وطلبت تقعد معايا لوحدى 

وفعلا خدتها ودخلنا المكتب بس الغريبه 

بصت لصوره باباك جامد وكأنها ندمانه 

ولقيتها بتعرض عليه مبلغ وقدره وهتكون شريكه 

معانا بس فى السر 

ووقتها قولت يمكن حست بغلطه جوزها 

واللى عمله فينا وهى جايه تصلح الأمور 

بس بطريقه غير مباشره 

لان طبعا مش هطلع جوزها حرامى قدامنا

وبعدها كنا كويسين وكانت على طول تيجى 

تزورنا والشركه ابتدت ترجع زى الأول 

ووضع المالى للشركه اتحسن ورجع وضعنا 

فى السوق زى الأول واحسن

بس فى يوم لقيتها جايه وبتطلب تفك الشراكه

ولما سألتها قالت إن خالك عادل بيحبها

وبيضايقها بحبه ليها لدرجه انه طلب منها 

تتطلق من منسى وهددها يا تطلق 

يأما يقول على سرها انها شريكه معانا 

وفعلا فسخنا العقد وفضينا الشراكه 

وانا وقفت فى وش عادل 

وحصلت بينا مشاكل كتير بسببها 

لانه كان بيحبها للأسف 

ومع الوقت نساها بس متجوزش لحد دلوقتى 

ده لو عرف انها ماتت هيزعل اوووى 

.. يا ماما مصر كلها عرفت ما بالك خالى 

اللى مفيش خبر بيخفى عليه. 

.. بس غريبه ليه مقالش!؟ 

احمد قرب منها وحضنها وقال 

ماما يا ست الكل ما انتى طلعتى بنت بلد 

اهو وعارفه يعنى ايه غنى وفقير 

وحسيتى بالفقر ولما حبيتى بابا ضحى بأخته 

واهله واتجوزك

.. عاوز ايه يا احمد؟ 

.. عاوز اتجوز زهرررررررره❤️

انا بحبها اوووووى يا ماما نفسى تكون مراتى 

.. مراتك مره واحده يا احمد والله كبرت وبقيت 

راجل وعاوز تتجوز كمان 

.. انا بقيت راجل كده علشان انتى امى اللى 

ربتينى احسن تربيه وعشتى عليه بعد موت

بابا

رجاء قالت فى سرها انا مش هقدر اتكلم

زى ما عادل قالى

وردت وقالت : طيب انا عاوزه اشوفها ممكن

احمد قام من مكانه وباس ايدها وكان

طاير من الفرحه

ومسك الفون وبيتصل ب زهره

رجاء دخلت المكتب على عادل وقالت :

امل مرات منسى ماتت قصدى اتقتلت 

انت ليك يد فى قتلها... 



روايه صفقه على مطلقه 


الجزء الثامن 

الكاتبه // كوكى سامح



انت ليك يد فى قتلها يا عادل 

عادل قام وقف واتخض من دخولها فجأه عليه 

وقال : فى ايه يا رجاء مالك عينك بطق شرار

ليه كده!؟ 

.. رد عليه انت ليك علاقة بموت امل 

عادل قال فى سره انا لازم اعمل عبيط 

رجاء مجنونه وكانت بتعزها ولو عرفت 

ممكن تودينى فى داهيه. 

ورد وقال : امل مين انا مش فاهم حاجه

.. امل مرات منسى ايه نسيتها ولا عامل 

ناسى يا عادل بيه 

.. اه انا عرفت انها ماتت والله يا اختى يا حبيبتى 

حاولت اعمل الواجب واكلم منسى علشان 

اقدم واجب التعزيه إنما مردش عليه

حتى شوفى الموبايل تعالى 

شوفى انا متصل كام مره بيه 

.. انا مليش دعوه بكل ده ريح قلبى يا ابن 

ابويا انت اللى قتلتها 

.. انا اقتل ليه كنت قتال قتله انا متربى 

يا رجاء كويس وانتى عارفه كده 

.. بس انت كنت بتحبها 

.. ده ايام زمان وكنت صغير وانتى عارفه 

اخوكى قلبه جامد وفى النسيان ميتوصاش

.. معلش حبيبى انا حبيت اطمن عليك 

انت عارف انى مليش غيرك انت وأحمد 

وبعدين استغربت انت ازاى تكون عارف انها 

ماتت ومتقولش 

.. علشان عارف انك هتتأثرى بموتها 

وكمان هى لسه مدفنتش 

.. انا زعلت عليها اوى يا عادل 

حرام تموت الموته البشعه دى 

منه لله يموت موتتها ان شاء الله اللى عمل فيها

كده 

رد وارتبك من كلامها 

اممم اه اه منه لله بس اكيد اللى قتلها حد 

من أعداء منسى ما هو اعداءه كتروا اوووى 

.. ربنا ينتقم منه اكيد كله بسببه 

ما كان سبب موت جوزى وعشت ارمله 

عمرى كله؟ 

.. يا رجاء منسى ميعرفش ان احنا عرفنا 

انه السبب فى ضياع ثروه جوزك 

بس وعد منى مش هسيب حقه 

.. ما خلاص بقى خلصنا من الموضوع ده 

امل وقفت جمبنا كتير علشان خاطرها

هى بس خلينا فى حالنا وهو فى حاله 

كفايه علينا المنافسه فى الشغل 

واحنا الحمد لله اكبر منافسين لي 

رد وقال ونظره عينه كلها خبث

عندك حق احنا فعلا خلصنا 

.. بقولك ايه احمد مصمم يتجوز زهررره 

انا مردتش اقوله لأ زى ما انت قولت 

بس طلبت اشوفها كنوع من انواع الهروب 

.. البنت حالتها وحشه أهلها كلهم ماتوا 

اثر اختناق غاز

فقدت أهلها كلهم متقلقيش مش هتيجى

لأن لما كلمتها كانت حالتها زى الزفت

حتى الشغل معملتش فيه حاجه

.. شغل ايه يا عادل مش هى خلاص مشيت

من الشركه

.. كانت بتخلص شويه ورق وخلاص

.. المهم انا مش عاوزه احمد يتعلق بيها

ارجوك مدخلش ابنى فى حوارتك

.. احمد بيحبها من غيرى انا مليش دعوه بحبه 

ليها

ما هو مش زرار اقولوا حب يروح يحب

فى شقه زاهر..

زهره قاعده على السرير والفون قصادها

وقاعده شارده وعينها كلها دموع

الفون رن وكان احمد

مسكت الفون واستغربت وقالت :

انا مش نقصاه دلوقتى الواد ده اهبل

ومش راجل ورجاء اللى بتحركه

من الاخر كده دلدول

والفون وقف رن

ورن تانى بس رددت..

ازيك يا زهره اخبارك ايه

الحمد لله انا كويسه

فى حاجه يا بنتى حاسس ان نبرة صوتك

متغيره

زهره بتبكى وانهارت وقالت أهلى يا احمد

كلهم ماتوا مخنوقين من الغاز

البقاء لله انا بجد اتفجأت

طيب انتى فين دلوقتى

رددت بكل سذاجه وقالت :

انا فى شقه زاهر

زاهر مين يا زهررره

ابن اخو منسى عرفته

ايه ده انتى قاعده عنده ازاى وايه عرفك بيه

شغل يا احمد ارجوك اقفل دلوقتى علشان

انا تعبانه

رد وقال : ممكن العنوان اجى اعزيكى

وزهره قالت العنوان بكل سذاجه!

وقفل معاها والغيرة ماليه قلبه

وقام يلبس علشان يروج ل زهره فى شقه

احمد

فى ڤيلا منسى..

زاااااهر.. عمى انا خلصت كل الإجراءات

ويومين وتصريح الدفن هيطلع

والمتر متابع ملف القضيه وهيبلغنا بكل جديد

وان شاء الله القاتل هيتعرف فى اققرب وقت

. هدير قاعد بتعيط وماسكه صوره مامتها

منسى.. ان شاءالله يا زاهر المهم التصريح 

علشان انت عارف يا ابنى إكرام الميت دفنه 

هدير.. بابا نفسى اشوف ماما لأخر مره 

أودعها 

منسى.. امك فى المشرحه يا حبيبتى مش هينفع

دى جريمه 

زاهر قرب منه وقال : ايه يا عمى اللى بتقولوا

ده ومسك هدير وحاول يهديها 

ومسكت ايده وخرجوا الجنينه مع بعض 

فون زاهر بيرن وكانت زهره 

وبعد عن هدير ورد وقال 

زهره حبيبتى شويه واكون عندك 

قلبى بقولك بتحبى البيتزا

هدير مش مستوعبه وهى سامعه زاهر بيكلم

بنت وكمان عنده فى الشقه

ولما قفل مع زهره رجع وقف مع هدير

وابتدى يواسيها فى موت مرات عمه

بس هى ساكته ومش بتتكلم

منسى... تعالى يا زاهر عاوزك

هدير بتكلم نفسها وقالت

انا لازم اروح شقه زاهر واشوف مين دى

اللى قاعده معااااه

واستغلت ان منسى وزاهر انشغلوا مع بعض

وقالت للشغالة انها خارجه فى مشوار

ومش هتتأخر

وفعلا خرجت وركبت عربيتها وطيران على شقه

زاهر ولما وصلت وطلعت فضلت واقفه على الباب

شويه وكانت متلغبطه بس رنت الجرس 

زهره فى اوضه النوم وماسكه الفون وبتفكر

ولما سمعت جرس الباب قالت 

زاهر جه ومخدتش بالها ان المفروض يكون 

معاه مفتاح وقامت جرى وفتحت الباب 

وشافت هدير بنت ناس ولابسه 

ملابس غاليه 

زهره.. مين؟ 

هدير زقت الباب ودخلت وقالت 

انتى اللى مين ده بيت ابن عمى 

زهره.. انتى بنت عم زاهر؟ 

هدير.. اه بنت غريبه دى بس معلش 

عاوزه اعرف انتى بتعملى هنا ايه فى شقه 

راجل عازب 

زهرة.. انا سكرتيرة منسى بيه 

هدير.. سكرتيره بابا ولا زاهر بس بردوا 

مش مبرر انك تكونى فى بيت شاب عازب 

ولوحدك ولا انتى منهم بقى ولا ايه 

زهره اتجننت من كلامها وقالت 

انتى بتقولى ايه انا اشرف من الشرف 

انا قاعده هنا علشان عندى ظروف أهلى كلهم 

ماتوا 

هدير.. يا حرام صعبتى عليه. 

هو انتى هتحكيلى قصه حياتك 

انا قدامى دلوقتى واحده بنت لا من عيلتنا

ولا نعرفها وفى شقه ابن عمى 

عاوزه اعرف انتى هنا بتعملى ايه؟ 

زهره.. زاهر قالى استناه 

هدير.. انا بقى بقولك وعن لسان زاهر 

اتفضلى أمشى دلوقت 

احمد وصل وكان الباب مفتوح 

ودخل جرى ومخدش باله من هدير 

بس جرى على زهره وحضنها وقال

وحشتينى يا زهره البقاء لله

شيدى حيلك يا حبيبتى 

زهره.. ايه يا احمد ده 

هدير.. الله الله وكمان راجل وفى ميعاد 

بينكم هنا فى شقه ابن عمى 

وهو ميعرفش ده انتى طلعتى بت مش 

تمام وزباله 

احمد.. اوعى تغلطى فى زهره 

هى مين دى يا زهره 

زهره اتعصبت وقالت : ارجوك اسكت دلوقتى 

هدير.. فعلا المظاهر خداعه 

انتى شكلك بنت جميله وزى الملاك 

بس من الواضح انك زى العضمه بتحب الكلاب 

حواليها 

وخرجت ونزلت جرى واتصلت ب زاهر 

وقالت انها كانت فى مشوار وحاسه بتعب 

ووقفه بعربيتها عند عمارته 

زاهر ركب عربيته بسرعه وكان خايف 

على هدير لأنها مريضه قلب 

ولما وصل كانت فى العربيه 

وطلب منها تروح للدكتور بس هى رفضت

لأنها كانت بتمثل انها تعبانه 

رد وقالها : انا هطلع الشقه هجيب حاجه وانزل 

وطبعا علشان يطمن على زهرة 

هدير..ماشى بس متتأخريش

وقالت فى سرها انا مش لازم اسيبك لغيرى 

انت حب عمرى اللى اتولد جوايا بعد ما ولاء 

ماتت حبيتك بجد وفى الاخر حته بت صايعه

تاخدك منى لأ والف لأ

زهره منهاره وبتبكى من كلام هدير

احمد قرب منها وخدها فى حضنه

وقال : البقاء لله يا حبيبتى

انا بحبك يا زهرة


زاهر طلع وكان باب الشقه مفتوح وكان

مستغرب وفى نفس الوقت خايف على زهرة

احمد.. بحبك يا زهره خلاص يا حبببتى

ماما عاوزه تشوفك ووفقت على جوازنا

زاهر.. يا خاينه وفى شقتى كمان...

يتبع

علقوا ب 20 ملصق علشان يوصلك اشعار الجزء
التاسع وياريت الكل يعلق علشان البوست يوصل لكل أعضاء الصفحه 👍🏼



 

 

الكاتبه كوكى سامح
كاتب المقالة
كاتب ومحرر اخبار اعمل في موقع روايات الكاتبه كوكى سامح .

جديد قسم : رواية صفقه علي مطلقه