-->




روايه بنت فى ورطه


الجزء الرابع



الكاتبه كوكى سامح


حوريه نامت بعد شكه الدبوووس

__ بعد مرور يومين فى قصر أيوب
تقوم حوريه من النوم وهى بتتوجع من ألم فى جسدها.. بصت جمبها على الكومود وشافت حقن وأدويه😱

مجهوله.. حمدالله على السلامه يا انسه حور
حوريه بخضه... انتى مين؟
مجهوله.. معقول نستينى يا حور هانم
انا الممرضه بتاعتك
حوريه بوجع.. اااااه.. ممرضه ليه هو انا تعبانه
ومسكت جسمها.. انا فعلا حاسه انى جسمى مكسر
بس مش لدرجه ان يكون عندى ممرضه

الممرضه.. انا أسمى أمل يا هانم.. حضرتك بعد ما رجعتى من امريكا.. حصل معاكى شويه تعب

وجلال بيه أمر ان اكون جمبك على طول
حوريه.. مين جلال ده!؟

أمل.. لا حول ولا قوة الا بالله.. جلال بيه
ابن عم حضرتك!؟

وبتوتر قامت من مكانها وفتحت الدولاب
وطلعت منه علبه خشب بنى قديمه جداً

وقعدت جمبها على السرير

وحطتها على رجلها

حوريه ماسكه دماغها وبعدم تركيز.. ايه ده!

أمل.. العلبه الخشب دى جلال بيه سابها
لحضرتك امانه وقالى لما تفوق لازم تفتحها

وقال إن فيها ورق مهم جداً
حوريه.. ورق ايه! .. انا مش فاهمه حاجه خالص!

أمل.. معرفش؟.. بس ممكن حضرتك تفتحيها

حوريه بتفتح العلبه وايدها بترتعش

وبصت للممرضه.. انتى قولتى اسمك ايه؟

الممرضه بحده .. تانى يا هانم.. انا أمل

حوريه.. طيب افتحى العلبه علشان انا حاسه
ان كل اعصابى سايبه
مش عارفه فى ايه.. وبصت لإيدها والرعشه
بتزيد، انا بجد مش عارفه مالى

امل خدت العلبه وفتحتها وطلعت منها ورق وسلسلة مفاتيح دهب

وبتعجب وذهول.. الله ايه الجمال ده
سلسله مفاتيح دهب وكمان مطبوع عليها اسمك
حور العين😱

يااه انا اول مره اشوف سلسله مفاتيح قيمه
بالشكل ده

حوريه بعدم تركيز.. طيب شوفى الورق فى ايه؟

أمل.. حاضر حاضر.. معلش يا انسه.. احم.. قصدى يا هانم، اصل السلسله عجبتنى وشدتنى ليها

وشافت الورق وقرأته

ومسكته فى ايدها وبتعجب شديد.. ايه ده؟
حوريه.. ايه.. الورق فى حاجه مش كويسه ولا ايه
بالظبط

أمل.. ده عقد باسمك يا انسه حور
حوريه.. عقد بأسمى انا
أمل.. ايوه.. عقد بيثبت ان القصر ده ملك حضرتك

بأسم حور العين شمندى
وطلعت شهاده ميلاد بنفس الاسم

ومدت ايدها بالعقد وشهادة الميلاد

حوريه.. ايه ده!
أمل.. الورق يا حور يا هانم

اللى يثبت ان القصر ده كله ملكك وكمان شهاده
ميلادك

حوريه بصت حواليها.. قصر ايه اللى مالكى!
أمل وقفت ودبت برجليها على الارض

القصر ده يا انسه حور

حوريه بتحاول تقوم من السرير.. شالت الكوڤرته
من عليها.. العلبه وقعت على الارض

ووقع منها ورقه مختلفه عن العقد وشهادة الميلاد

أمل وطت وجابت العلبه والورقة

وقالت.. فى ورقه تانيه ومكتوب فيها كلام

وابتدت تقرأ الكلام بصوت عالى
وحوريه بتسمع ___

" بنت عمى واختى حور خلى بالك من نفسك
اوى لحد ما ارجع انا سافرت فى شغل
بس سبتلك الأمان

شهاده ميلادك وعقد القصر وكمان المفاتيح

اى اتهام اتوجهه ليكى من أيوب واخته وولاد عمه
وريهم الورق اللى بيثبت انك صاحبه القصر

انا عاوزك تكونى واثقه من نفسك لأنك على حق🤚🏼وعموما معاكى أمل الممرضه
البنت دى كويسه جدا

انا عن نفسى بثق فيها

اى حاجه وقفت قصادك
هى هتحلها وهتكون جمبك وفى ضهرك

بس المهم مش عاوزك تخطى خطوه من غير ما تعرف___
انتى قويه يا حور العين 💪
وهتكونى أقوى لما تاخدى حقك من أيوب وولاد عمه
ابن عمك جلال _______"

حوريه.. ايه ده هو سايب وصيه
أمل.. لا يا هانم
ده بيفهم حضرتك ايه اللى هيحصل
وعموما متخافيش.. انا معاكى

حوريه.. مين أيوب واخته وولاد عمه
وايه صله القرابه اللى بينا
علشان انا بجد مش فاهمه اى حاجه
وبعدم تركيز.. انا حاسه ان اول مره اسمع
ان أسمى حور العين
الظاهر كده انى فعلا تعبانه
وبجد عاوزه إجابات.. لو تعرفى حاجه
يا أمل قوليلى لو سمحت

أمل بخوف.. انسه حور
انا كل اللى اعرفه ان حضرتك بعد ما رجعتى من
أمريكا كان عندك حاله اكتئاب وكنتى بتتعالجى
فى مصحه

حوريه بذهول.. انا كنت فى مصحه
وكمان كنت فى أمريكا
مسكت دماغها.. بس انا مش فاكره حاجه؟!

أمل.. اكيد من الادويه اللى كنتى بتاخديها
بس انتى كنتى فين وبقيتى فين
الحمد لله

ده انتى كنتى نايمه طول الوقت وبتخرفى كمان

حوريه.. طيب ومين أيوب وولاد عمه واخته

أمل.. كل اللى اعرفه ان جلال بيه قالى
ان فى بينك وما بينهم مشاكل
بس مقالش هى ايه

وقال انهم فى مصيف وراجعين بكره
ولازم بقى حضرتك تصلبى طولك كده
علشان لما يرجعوا تقدرى تتكلمى معاهم

حوريه بعصبيه.. اتكلم معاهم فى ايه!
أمل.. مش جلال بيه كاتب فى الورقه
لو حد فيهم كلمك تطلعى العقد وشهاده الميلاد

حوريه.. طيب وليه اثبت لهم ده
امل.. والله ما اعرف غير اللى قولتوا

وقربت منها.. يا هانم بكره مش بعيد

كلها سواد الليل ولما يرجعوا اكيد هتعرفى
من كلامهم هما عاوزين ايه

حوريه.. انا جعانه اوى
ونفسى كمان اخد شاور

أمل.. حاضر.. انا هنزل المطبخ واعملك احلى أكل
من عنيه الاتنين

حوريه.. هو فين الحمام؟

أمل.. فى الاوضه هنا وشاورت بإيدها عليه
حوريه.. هو فى حد هنا غيرى انا وانتى

أمل.. كان فى ست شغاله وطباخ
بس جلال بيه طردهم وقالهم ان القصر رجع لأصحابه

حوريه.. طيب.. انا هقوم اخد شاور
وانتى اعملى أكل بسرعه لأنى ميته من الجوع

أمل بفرحه.. من عنيه

وفتحت الباب ونزلت جرى ___

اما حوريه قامت بصت من بلكونه الغرفه

وكانت بتطل على الجنينه الواسعه الجميله

وقالت.. معقول ازاى اكون صاحبه القصر الجميل
ده

واعانى من اكتئاب واتعب.. سبحان الله

اللى يعيش هنا المفروض يحس براحه

وبداخلها.. الغريب ان الممرضه بتكلمنى عن نفسى

وانا مش عارفاها اصلا

لدرجه انى ناسيه أسمى وكمان مش فاكره
ان سافرت أمريكا

ياااه أمريكا الحلم.. انساها طب ازاى؟!

ودخلت وبصت للأدوية والحقن

وقالت.. صحيح مفيش أسوأ من المرض

ودخلت الحمام تاخد شاور ولما قلعت هدومها

لاحظت حاجه غريبه

ان دراعها ازرق جدا من آثار الحقن

وكمان فى شكه ابره فى رجليها

خافت جدا

خدت الشاور ولابست هدومها وخرجت قعدت
على السرير

وشافت جمبها فون.. مسكته وبقت تقلب فيه

ملقتش غير رقم واحد بس بأسم جلال

ولسه بتتصل ___

الباب اتفتح ودخلت عليها أمل وفى ايدها
صينيه آكل

أمل لمحتها وهى ماسكه الفون
وبتجاهل.. انا جيييت وعملتلك أكله إنما ايه
هتاكلى صوابعك وراها

حوريه بابتسامه.. ميرسى.. تسلم ايدك
أمل.. انتى بتعملى ايه؟
حوريه.. كنت عاوزه اكلم جلال
واعرف منه شويه تفاصيل

اصلى مش فاكره حاجه
كنت عاوزة اعرف ايه طبيعيه مرضى
علشان اتعالج

وبعدين انا ازاى اكون صاحبه قصر زى ده ومش
بتعالج وتعبانه بالشكل ده

وبصت حواليها.. وبعدين انا مفيش غيرى
هنا.. هو انا مش عندى اهل ولا ايه

أمل.. ما انا مكنتش عاوزه اقولك
حوريه.. انتى تعرفى حاجه.. قوليها بسرعه
ابوس ايدك!

أمل بدموع كلها خبث.. انا مكنتش عاوزه اقول
بس لازم اقولك وامرى لله

الاكتئاب جالك بعد الحادثه

اللى مات فيها جوز مامتك ومامتك واخوكى الوحيد من مامتك وانتى بس اللى ربنا نجاكى

حوريه.. جوز ماما!
امل.. ايوه.. اصل اللى عرفته من جلال بيه
انك يتيمه من بعد ما اتولدتى

والست والدتك الله يرحمها بقى اتجوزت
جوزها اللى كان فى مقام والدك واكتر

علشان كده انتى تعبتى بعدها

وجالك اكتئاب وشبهه فقدان ذاكره
وبتنسى كتيييير اوى

حوريه بدموع.. يعنى انا يتيمه ومليش حد غير
جلال
أمل.. ايوه

حوريه.. نفسى اكلمه واشوفه
أمل.. بعدين.. كلى الاول وبعدين نتكلم

حوريه.. بقولك ايه!
امل.. نعم
حوريه.. فى جسمى فى مكان حقن كتير
وكمان رجلى فيها شكه غريبه متعرفيش ده
من ايه!

امل بتوتر.. اللى فى ايدك من حقن الاعصاب
وكمان الفيتامين اما اللى فى رجلك
بصراحه معنديش فكره

بس ممكن تكون كدمه مش حقنه

حوريه.. ممكن؟

وقعدت تاكل وكأنها مأكلتش من سنين

حوريه كانت بتاكل بشراهه جدا

وبعد ما خلصت.. امل شالت الصينيه

وقعدت تتكلم معاها لحد ما نامت

حوريه كانت قاعده ومفيش نوم فى عينها

بس بصه لساعه الحائط ولما العقرب وصل

لساعه 12:55 ص

قامت من مكانها ونزلت الجنينه وكانت الساعه

1 صباحا

خرجت الجنينه وهى بتتفرج على القصر

وبصت تحت رجليها وشافت ظرف لونه احمر
كان شكله غريب ومميز
خدته وفتحته ولقت مكتوب فيه

"لازم تعرفى يا حور العين
ايه هو سر القصر؟؟؟؟؟؟"

ولو عندك فضول وعاوزه تعرفى سر القصر
كل يوم الساعه واحده صباحا هتلاقى ظرف
فى نفس المكان والمكتوب فيه هيوصلك
لحقيقه سر القصر ___

حوريه.. سر ايه؟.. هو القصر لى سر كمان🤔
مش كفايه عليه أيوب وقرايبه
اللى انا معرفش هما عاوزين منى ايه

وخدت الظرف وطلعت اوضتها نامت جمب امل
وهى متعرفش ايه مستخبى لها

فى صباح اليوم التالى ____

حوريه صحيت من النوم وفطرت وخدت حقن الفيتامين والاعصاب وكمان كبسولات وطبعا كل ده مقتنعه انها مريضه ب الاكتئاب والنسيان بعد ما اقنعتها امل

نزلت الجنينه وشافت ورد ابيض من اللى بتحبو
وقطفت ورده

وطلبت من أمل انها تتدخل المطبخ تجدد نشاطها
وتعمل الغدا وتكون اكله بتحبها وهى شاورمه فراخ

دخلت المطبخ تعمل الشاورما.

وفى نفس الوقت كان أيوب وصل بعربيته

امام القصر

هو وولاد عمه احمد ومحمد وسالى اخته

وبعد ما نزلوا منها.. أيوب لاحظ ان البوابه مفتوحه
والبواب مش موجود

دخل وركن العربيه وكان مضايق جدا

سالى.. فين فوزى البواب
احمد.. انا كذا مره قولتلك يا سالى ان الراجل
ده مش امين ولازم يمشى

سالى.. هههههههه ومين امين فى الزمن ده
احمد.. عندك حق والله
أيوب بنرفذه ودخل القصر وبزعيييق

انت يا عم فوزى.. انت يا بيه فينك

انا عارف تلاقيك فى المطبخ

ما انت مش وراك غير الآكل وبسسس

احمد.. انا بقولكم نمشيه من هنا
سالى.. ممكن تسكت خالص.. أيوب اكيد هيبهدلو

فون أيوب رن وكانت خطيبته رد عليها

خرجت حوريه من المطبخ وفى ايدها الشاورما

وبتقول.. امل.. تعالى بقى دوقى شاورمتى

هتاكلى صوابعك وراها وشافت أيوب

أيوب ساب الفون من ايده

وبذهول.. ايه ده.. انتى مين؟

سالى جريت عليها
ومسكتها من دراعها بكل قوه😱
الشاورما وقعت منها على الارض

انتى ايه اللى جابك هنا تانى يا بت انتى ها

أيوب.. مين دى يا سالى؟
تراكمت الدموع فى عين حوريه وقالت بصراااخ
ااااااااامل الحقيييييينى

سالى.. انت مش عارف دى مين؟
دى البت الخدامه اللى كسرت الفازه وطردتها😱_________

السؤال هنا.. ازاى سالى عرفت حوريه
مع ان المتسول كان اتفاقه معاها ان محدش
هيعرفها.. يا ترى ضحك عليها ولا هينقذها

يتبع


كوكى سامح
كاتب المقالة
كاتب ومحرر اخبار اعمل في موقع روايات الكاتبه كوكى سامح .

جديد قسم : رواية بنت فى ورطه

إرسال تعليق